Ketä täälä Polarbibblossa oon töissä?
Kollaapa tätä sivua ja tutustu meihin jokka olema Polarbibblossa töissä. Joku kertoo hänen favuriittipaikasta, toinen kertoo mitä hään pölkää. Kaikin oon kuiten sammaa mieltä yhestä asiasta ja se oon ette Polaribblo oon hyä ja turvalinen sivu lapsile.
Alexandra
Minun nimi oon Alexandra ja minun työ on kehittää Polarbibbloa vielä paremmaksi. Se, ette tämä oon turvalinen paikka missä lasten iteat ja fanttasii saapii näkyä, se oon parasta Polarbibblossa.
Joo, eikös se olekki hyä mutta kerroppa lissää sinusta ittestä. Missä sie triivastut, ja pölkääks mithään? Korkeita vaaroja eli semmosta?
Mie triivastun korkeissa paikoissa, esimerkiksi Itävallassa missä oon vaaroja, niin ette korkeat paikat ei pölätä minua. Hämähäkit sen siihaan, niitä mie pölkään.
Annette
Minun nimi oon Annette, asun omassa talossa ja tykkään lukea, kalastaa, träänata veessä, käyä teatterissa ja kerätä kukkia. Mie olen vastuusssa kansallisista minuriteettikielistä täälä Polarbibblossa.
Sanothaan ette sulla oon supervoima. Saataks sanoa äähneen mikä se oon eli katoaako se jos niin tehet?
Saatan tietenki sanoa sen! Minun supervoima oon ette mie puhun meänkieltä.
Mitä sie pölkäät sitte?
Ette ajjaa piililä jään yli oon minusta tylyä hommaa. Riisipuuro kans.
Desirée
Minun nimi oon Desirée ja mie olen Piteån pipliuteekissa atministratöörinä töissä. Polarbibblossa mie olen vastuussa riittauksista ja runoista.
Sie ossaat yhen villin fräänin kielen. Miksikä sie kuttut sitä kieltä?
Mie ossaan kommyniseerata gestuaalisella ja visuaalisella kielelä ja sitä kuttuthaan viittomakieleksi. Jos sulla oon huono kuulo, olet kuuro ja sokea tai jos sulla oon jonkulainen kehitysvamma. Mailman kauhnein kieli minusta.
Kunka sie olet oppinu sen kielen? Kerroppa vähän lissää!
Minun veli oon kuuro niin mieki olen oppinu viittomakielen. Kaikissa maissa oon oma viittomakieli. Kaikila ihmisillä ja elläimillä oon oma viittomamerkki. Minun koiran viittomamerkki näyttää ette sen korva taittuu alas ja se oon tyypillistä hälle. Hauska!
Mikä viittomamerkki sulla oon ja kunka se tehhään?
Minun merkki näyttää ette mulla oon hymykuoppa poskessa. Pistä oikea pikkusormi oikealle poskele niin sie olet tehny sen.
Lopuksi vielä yks kysymys. Sie sanot ette pölkäät tummaa, syvvää vettä. Miksi?
En mie tiä sitä, se tuntuu ette sielä pohjassa oon joku mikä halvaa syä minun varphaat.
Emma
Minun nimi oon Emma ja mie olen töissä Piteån pipliuteekissa ja retaktöörinä Polarbibblossa.
Kerroppa jotaki sinusta ittestä, vaikkapa hemlis?
Minun unelma oon ette rakentaa oman talon jonnekki maile ja toinen asia oon ette mie pölkään kissoja. Isoja ja pieniä, aivan sama.
Mie olen kuulu ette sulla oon aika hyä supervoima, varsinki jos halvaa rakentaa oman talon. Kerroppa!
Se oon riittaaminen. Mie piiain riittaan oman unelmatalon ittele ennenkö alan rakentahmaan sitä.
Mikä sinusta oon paras asia täälä Polarbibblossa?
Kaikki fiinit piitraakit joita lapset lähettävät meile koko Ruottista.
Ida
Mie olen Ida ja tehen työtä saamen kielten kans täälä Polarbibblossa.
Onku sulla mithään hemlistä eli jotaki mitä kukhaan ei tiä sinusta?
Mie rakastan kuivattua islantilaista kallaa ja sitte mie olen mahottoman hyä siivoahmaan ja pakkaahmaan väskyjä.
Onke se tosi ette sie tykkäät olla tunturilla ja hevosen sölässä mutta ette sie pölkäät korkeita paikkoja?
Haha! Joo, niin se oikeasti oon! Tunturilla ja hevosen sölässä mie unheutan pölkäämisen.
Julia
Minun nimi oon Julia Rensberg, olen kielistä kiinnostunu ja mulla oon oma firma missä mie tehen saamelaista käsityötä.
Kerroppa vähän lissää?
Duodji oon saamenkieltä ja tarkottaa käsityötä. Mie tehen käsitötä eri materiaalista ja käytän nahkaa, puuta ja sarvea.
Sie näytät triivastuvan ulkona kessää ja talvea?
Se stämmaa! Minun favvupaikka oon jäälä, ko saapii pimplata aurinkoisena keväpäivänä. Eli kläppina ko opettelin seilaamista kesäsin.
Kerroppa, onkos sulla supervoimaa?
Oon, minun supervoima oon ette ossaan praatia poroitten kans.
Sepä jännä. Uskoks ette porot pölkäävät sammaa asiaa ko sie?
Joo, mie oikeasti uskon ette net pölkäävät sammaa ko mie, klimaattikriisiä!
Linda NW
Minun nimi oon Linda ja tehen kaikkea sitä mitä sie näet Polarbibblossa, kirjotan tekstiä, testaan ette kaikki toimii. Mie olen riitanu monet niistä kuvistä joita sie näet ja kans tehny kuvakertomuselliämet. Mie olen retaktööri ja vastaan meihliin ko sie kirjotat tänne meile.
Onko se tosi ette sie muistat kaikki minkä sie näet ja kuulet?
Joo, se oon tosi! Mulla oon villin hyä muisti ja muistan melkein kaikki minkä luen, näen eli kuulen.
Mikä sinun mielestä oon karmeinta mitä tiät?
Muuhraiset 😱
Saataks kertoa hemliksen sinusta eli jotaki mitkä kukhaan ei tiä sinusta?
Mie röyhtelen vain ko mulla oon nälkä, enkä ko mulla oon vatta täynä.
Linda Å
Minun nimi oon Linda ja mie otan vastahaan ja julkasen suomenkielisiä piitaakia Polarbibblossa ja muuten mie olen töissä suomen kieliesessä pipliuteekissä Tukholmassa.
Onko se tosi ette sulla oon villin monta elläin-kaveria?
Mie tykkään virkata pikkusia elläimiä joita mie kuttun minun kaveriksi ja niitä oon kertyny muutama...
Pölkääks mithään elläintä?
En pölkää virkattuja elläimiä, haha! Vaikka mie tiän etten mie kohtaa vaaralisia kärhmeitä luonossa Suomessa eli Ruottissa mulle tullee paniikki ko näen yhen mettässä.
Sie halusit lapsena olla töissä elläimitten kans, kerroppa!
Mie halusin telfiinihoitajaksi mutta vanhempana mie käsitin ettei se ole niin eettistä pittää telfiiniä akvaariymissa.
Oonkus sulla mithään supervoimaa?
Minun kaverit tykkäävä ette minun virkkaus-taito oon supervoima mutta mie tykkään ette kielet oon minun supoervoima. Mie ossaan suomea ja engelskaa ja sitte mie ossaan sanoa "minun piili oon sininen" japaniksi mutta mie en koskhaan sano sitä ko mulla ei ole piiliä.
Mervi
Minun nimi oon Mervi ja ko sie näet ette sivula oon uusia tekstiä eli aktiviteettiä niin se olen mie joka tehen ette net näkyvät sivula. Ko sie lähetät runon eli tekstin niin mie otan vasthaan ja julkasen sen sivule.
Mikä oon parasta Polarbibblossa?
No, se ette lapset saavat käyttää meänkieltä ja saamen kieliä. Net kielet oon olheet olemassa Ruottissa rohki kauan mutta niin moni ei ossaa niitä ennään.
Missä paikassa sie triivastut?
Mie olen ostanu venheen ja toivon ette siittä tullee semmonen paikka missä mie triivastun mutta mie en tiä. Jos oonki tuulista ja paljon myrskyjä? Jos sulla oon tipsiä miten minusta tulle oikea merenkulkija niin anna tulla!
Sanna
Minun nimi oon Sanna ja olen poronhoitaja. Täälä Polarbibblossa mie otan vasthaan lasten tekstiä luulajansaamen kielelä ju julkasen net sivule.
Onko sulla supervoimaa tai mithään hemlistä jonka saatat kertoa ittestä?
Joo, minun supervoima oon ette mie ossaan seisoa käsilä ja hemlis minusta oon ette mie piilotan kompiaisia sängyn alla.
Mikä sinusta oon hauskaa Polarbibblossa?
Mie tykkään ette muistipelit oon hauskoja pelata!
Joo, net oon hauskat! Mikä oon paras paikka minkä sie tiät sitte?
Minun favvupaikka oon meän kesäpaikka Saluhávrre mikä oon tunturissa.
Sara
Mie olen Sara ja olen nuortenpipliutikaarie mutta mie tykkään tehä työtä pienten lasten kans. Minun työkaverin työ oon lukea satuja lapsile mutta joskus mie varastan hänen työn ette mieki saan lukea satuja lapsile.
Onpa hauska ette tykkäät sinun työstä mutta sie halusit erillaisen työn lapsena, kerroppa!
Ko mie olin kaheksan mie halusin nuohoajaksi. Mie tykkäsin ette se oli soma laukkoa katoila ja olla niin likanen ko itte halusi!
Onko sulla jonkulaista supervoimaa mikä tekkee sinusta yniikin?
Oon kyllä. Minun supervoima oon ette pystyn sortteeraahmaan poijes ääniä. Jos joku ääni häirittee minua niin mie saatan lopettaa kuuntelemisen. Joskus mie en tehe tätä tahala ja siksi en kuule mitä mulle sanohtaan. Ups!
Joo, sehän oon ikävä jos niin käypii ko joku pyytää sinua tiskaahmaan eli siivoahmaan mutta onko jossaki paikka missä sie triivastut, missä saat "olla vain"?
Oon semmonen paikka ko Bergnäs, Arvidsjaurin ja Arjeplogin välilä. Oikeasti se paikka kuuluu minun vaimole ja hänen perheele, mutta se tuntuu kotilta. Sielä oon kaikki mitä tartten, vähän puita, paljon vettä ja eikä niin paljon pakko-töitä.
Sniikelit, halvaisiks sie kotielläimiksi niitä?
Voi ei! Mie pölkään mahottomasti sniikeliä. Ei pellaa rollia minkä sortin, simpukoita, mettäsniikeliä eli afrikkalaisia jättisimpukoita.
Stina
Minun nimi oon Stina ja olen töissä Piteån pipliuteekissa. Sielä mie kohtaan monen ikäsiä lapsia ja annan heile kirjatipsiä.
Mikä oon sinun supervoima?
Mie saatan hiipiä yhtä hiljaa ko ninja!
Sehän villin frääniä! Mikä oon parasta Polarbibblossa sitte?
Aattele ette kaikki lapset saavat lähettää heän töitä ja net julkasthaan, se oon mahottoman hyä. Mie tykkään Sanakonheesta, siltä saapii aina uusia ja hauskoja iteoita.
Mitä sie pöölkäät?
Mie pölkään lintuja, varsinki kalalokkia.
Therese
Minun nimi oon Therese ja mie asun perheen, kolmen koiran, kissan, lamphaitten ja kanoitten kans pienessä kylässä jonka nimi oon Mockträsk joka oon Puutin ulkopuolela. Mie olen lasten- ja nuortenkirjalia ja olen kans töissä Polarbibblossa.
Onko sulla hyä mielikuvitus, fanttasii, ko keksit kertomuksia ja kirjotat kirjoja?
Joo, oon mulla! Mie sanosin ette minun mielikuvitus oon minun supervoima. Tämän takia mulla ei koskhaan tule aika pitkäksi.
Kerro vaikka joku hemlis eli jotaki millä oon sinun mielikuvituksen kans tekemistä?
Ko mie olin lapsi mie uskoin ette meilä asu tontta. Vanhassa kakluunassa jota ei ennään käytetty. Mie tehin tontale sängyn ja laiton ruokaa sille siine luukuitten taka. Ruoka katosi sieltä! Mutta se taisi olla kissa joka söi sen. Eli mitä sie uskot?
Entä jos se oliki tontta? Mutta kerro, mikä sinusta oon parasta Polarbibblossa?
Se ette Polarbibblo oon olemassa on parasta! Mie olisin rakastanu Polarbibbloa lapsena! Mie tykkäsin kirjottaa mutta ei ollu aikusia minun ympärillä jokka saatoit auttaa minua.
Halvvaks kysyä meiltä jotaki?
Tästä saat meihin yhteyttä!