Kirjota runoja

Runo saattaa olla minkänäkönen vain. Runhous ja runot oon sama asia. Runo saattaa olla pitkä eli lyhy. Sinun ei tartte nouattaa mithään kirjotussääntöjä. Leekaa sanoitten kans.

PS. Sie et saata tehä väärin.

Fanttiseeraa

Kirjota ylös kaikki sanat mitä tullee miehleen ko sie kuulet sanan syksy. Sanoja ei tartte lukea äähneen. Käytä 90 sekunttia!

Käytä jotaki niistä sanoista jokka sie justhiin kirjotit ja kirjota runo syksystä. Sie saat lisätä sanoja eli suijuuttaa sanoja. Kirjota 2 minuttia!

Oliko siinä eroa kirjottaa runot? Tuliko niistä erilaiset?

Sie saatat pruuvata tehä saman harjotuksen seuraavilla sanoila: Sininen, kaverit, talvi, mysiikki, rakhaus.

Laita yhtheen sanoja

Kirjota ylös kaikki atjektiivit mikkä tullee miehleen. Atjektiivi kuvvaileee kunka joku oon, esim. keltanen, raitanen. Kirjota 1 minutti.

Kirjota ylös kaikki supstantiiivit mikkä tullee miehleen. Supstantivit oon asioitten nimiä, apstraktitten eli konkreettisten asioitten; esim pyörä, uni. Kirjota supstantiivia 1 minutti.

Kirjota ylös kaikki verpit mikkä tullee miehleen. Verpi oon jotaki mitä tehjään, esim pyöräillä, unelmoija. 1 minutti aikaa tähän!

Laita yhtheen yks atjektiivi, yks supstantiivi ja yksi verpi. Joskus sinun häätyy suijuuttaa sanoja. Esim. Keltanen pyörä uneksii, prikkunen koira tansaa. Käytä vain 45 sekunttia tähän.

Valitte yksi sinun meeninkistä ja kirjota runo jossa sinun meeninki oon rupriikkinä. Kirjota 2-3 minuttia.

Lue äähneen jos haluat. Joko sinun oma teksti eli vaiheta se kaverin kansa.

Kirjottakka sanoja yhessä

Kahestaan. Kirjottaakkaa niin monta sannaa ko saatatta yhestä pukstaavista. Kirjottakkaa 2 minuttia.

Lukeekaa äähneen teän sanat luokale/ryhmäle. Kirjottaakkaa mielelänsä sanat taulule. Alottaakkaa pukstaavilla M.

Mistä sanoista tet tykkäättä enniten? Mikkä kuulostaa suurimmalta? Mikkä kuulostaa pehmeiltä? Lujilta? Tuliko joistaki sanoista pitkiä? Mikä/Mikkä olit lyhhyimpiä? Jokku sanat rimmaava? Praatikaa sanoista 3 minuttia.

Kirjota muutama meeninki sanoista. Sanoja saattaa suijuuttaa. Lukekaa äähneen jos halvatta.

Lykkyä tykö!